Aðeins of mikið af víni í uppskrift Gestgjafans

„Við erum búin að hlæja mikið að þessu og gert mikið grín," segir Guðrún Vaka Helgadóttir, aðstoðarritstjóri Gestgjafans.

Nú gengur manna á milli linkur á heimasíðu Gestgjafans um leiðréttingu í blaðinu. Þar er sagt frá því að mistök hafi orðið í uppskrift að villisveppasósu í jólaútgáfu blaðsins.

Þar stendur að það eigi að vera 1 flaska af portvíni og 1/2 flaska af brandí í sósunni. Í leiðréttingu á heimasíðunni segir hins vegar að það hafi auðvitað átt að vera 1 dl portvín og 1/2 dl brandí.

Guðrún Vaka segist ekki vita hvers vegna þetta gangi á milli manna núna því uppskriftin birtist í jólaútgáfunni árið 2010. Þessi mistök voru leiðrétt strax í janúar á síðasta ári.

Hún segir að ekki hafi borist mörg símtöl frá lesendum þar sem ein og hálf flaska af eðalvínum var hellt út í sósu uppskriftina. „Við fengum eitt símtal frá konu sem benti okkur á þetta og spurði okkur hvort þetta gæti virkilega verið," segir hún.

Hún segir að stefna ritstjórnarinnar sé að gefa út villulaus blöð og það takist nú yfirleitt alltaf. „Þannig er mál með vexti að þessi uppskrift er frá Úlfari Sveinbjörnssyni og hann handskrifar allar uppskriftir. Sá sem pikkaði uppskriftina inn hefur óvart lesið dl sem fl," segir hún. „Og uppskriftin fór í gegnum allar prófarkir og það tók enginn eftir þessu," segir hún hlæjandi.

Hún segir að ritstjórnin hafi grínast með mistökin í fyrra og það hefði verið talað um að starfsmenn blaðsins myndu nota 1 dl af portvíni og 1/2 dl af brandí og svo væri restin bara drukkin.