Kolófært víða, snjóflóðahætta og rafmagnsleysi

Hellisheiði, Þrengslavegi og Reykjanesbraut var lokað í gærkvöldi vegna ófærðar og óveðurs og eru Hellisheiði og Þrengsli enn ófær, en Reykjanesbraut var opnuð til suðurs fyrir hálftíma.

Allar björgunarsveitir á suðvesturhorninu voru kallaðar út í gærkvöldi og hafa ásamt lögreglu aðstoðað fólk í vandræðum í alla nótt. Lögreglan á Suðurnesjum fékk á annað  hundrað beiðnir um aðstoð í nótt frá fólki, sem sat fast í bílum sínum í mikilli ófærð, bæði á þjóðvegum og í þéttbýli.

Fjöldi manns, bæði starfsmenn og flugfarþegar hafa hafist við í Leifsstöð í nótt, auk þess sem margir leituðu á hótel í Keflavík og í athvarf sem Rauðikrossinn opnaði í Holtaskóla í Keflavík. Seinkun er á vélunum frá Bandaríkjunum og ljóst að brottför allra véla til Evrópu seinkar, en allar tímasetningar um opnun vega og framvindu flugsins eru óljósar á þessari stundu.

Það er líka þegar búið að seina innanlandsflugi frá Reykjavík.- Það er líka ófærð fyrir austan fjall og  mikil ófærð er á höfuðborgarsvæðinu, þar sem lögregla hvetur fólk til að leggja ekki af stað fyrr en búið er að ryðja helstu leiðir. Búist er við að allur strætisvagnaakstur fari úr skorðum.

Mikið snjóaði á Vestfjörðum í gærkvöldi og í nótt, og var sveitabær í Syðridal við Bolungavík rýmdur undir miðnætti vegna snjóflóðahættu. Fyrr um kvöldið hafði bær verið rýmdur í Hnífsdal og tvö íbúðarhús á Ísafirði, sem eru í grennd við iðnaðarsvæðið , sem rýmt var í gærdag. Undir morgun fluttu björgunarsveitarmenn á Ísafyrði ófríska konu á sjúkrahúsið þar, eftir að hún tók léttasóttina.

Ekkert er vitað hvort eða hvar snjóflóð hafa fallið í nótt, þar sem ofankoma, myrkur og skafrenningskóf hefur birgt snjóeftirlitsmönnum alla sýn. Ófært er um alla Vestfirði, bæði á fjallvegum og í þéttbýli og samkvæmt veðurstofunni er óvissuástand vegna snjóflóða á norðanverðum Vestfjörðum og á Norðurlandi, hættustig vegna snjóflóða í Hnífsdal og á Ísafirði og Veðurstofan varar enn við hvassviðri á norðvestanverðu landinu.

Björgunarsveitarmenn komu fólki til hjálpar í gærkvöldi þar sem það sat fast á milli tveggja snjóflóða á Ólafsfjarðarvegi , norðan við Dalvík, og einnig þurfti að aðstoða ökumenn á Holtavörðuheiði, við Hvammstanga, á Fellsströnd í Dölum og sjálfsagt víðar.- Rafmagnslaust hefur verið á norðausturhorni landsins síðan í gærkvöldi að raflína frá Laxárvirkjun að Kópaskeri slitnaði.

Sleðaflokkar björgunarsveitarmanna ásamt rafvirkjum hafa verið að brjótast í ófærð að biluninni og er viðgerð væntanlega að hefjast, en varaaflstöðvar hafa verið keyrðar til að sinna brýnustu raforkuþörf.

Skólahaldi er víða aflýst vegna óveðurs og er foreldrum bent á að hafa samband við skólana, eða skoða heimasíður þeirra.