Ögmundur bíður með að tjá sig um ívilnun til Nubos

Tilraun Kínverjans Nubos til að fá Grímsstaði á langtímaleigu með ívilnun frá iðnaðarráðherra gæti leitt af sér ný átök milli stjórnarflokkanna. Ögmundur Jónasson innanríkisráðherra ætlar ekki að tjá sig um málið að sinni.

Eftir að Ögmundur hafnaði því að veita fyrirtæki Nubos undanþágu til að kaupa jörðina Grímsstaði lýsti Katrín Júlíusdóttir iðnaðarráðherra því yfir að leitað yrði annara leiða til að greiða fyrir tugmilljarða fjárfestingum Nubos á Íslandi. Ögmundur varð strax tortrygginn á áform Katrínar og sagði í viðtali á Stöð 2 þann 4. desember að ef gera ætti leigusamning um jörðina til þriggja ára eða lengur þyrfti að bera það undir innanríkisráðuneytið. Kvaðst Ögmundur vona að ekki stæði til að leiðbeina Nubo framhjá lögunum, eins og hann hefði grun um að gert hefði verið í Magma-málinu.

Heimildir Stöðvar 2 herma að það sé samkvæmt leiðbeiningum iðnaðarráðuneytis sem Nubo hefur nú á grundvelli laga um ívilnanir vegna nýfjárfestinga sótt um undanþágu til að gera samning um langtímaleigu á hluta Grímsstaða, til að byggja þar glæsihótel og annað stærra á Reykjavíkursvæðinu. Í iðnaðarráðuneytinu líta menn svo á að ráðherra þess málaflokks hafi lagaheimildir til að afgreiða málið án þess að bera það undir innanríkisráðherrann.

Ögmundur er á hóteli í Kaupmannahöfn þessa dagana vegna fundar dómsmálaráðherra Norðurlanda en aðstoðarmaður hans sagði í dag að hann hygðist ekki tjá sig að sinni um þessar nýjustu vendingar í Nubo-málinu.