Fjórir fengið ívilnanir - Nubo vill líka

Iðnaðarráðherra hefur á grundvelli nýlegra laga um ívilnanir þegar veitt fjórum aðilum undanþágur frá lögum vegna nýfjárfestinga á Íslandi. Kínverjinn Huang Nubo hefur nú sótt um að fá að njóta samskonar ívilnunar til að leigja Grímsstaði og byggja upp lúxushótel. Lög um ívilnanir vegna nýfjárfestinga á Íslandi voru samþykkt frá Alþingi árið 2010 en þau heimila iðnaðarráðherra að veita jafnt innlendum sem erlendum aðilum margvíslegar undanþágur frá lögum í því skyni að stuðla að atvinnuuppbyggingu.

Eftir að Ögmundur Jónasson innanríkisráðherra synjaði Huang Nubo um undanþágu til að kaupa jörðina Grímsstaði á Fjöllum kvaðst Katrín Júlíusdóttir iðnaðarráðherra ætla að vinna að því eftir öðrum leiðum að tugmilljarða fjárfestingar Nubos í ferðaþjónustu hérlendis gætu orðið að veruleika. Nú hefur Nubo sótt formlega um undanþágu til iðnaðarráðherra á grundvelli þessara laga til að fá hluta Grímsstaða til langtímaleigu og einnig til að byggja lúxushótel bæði á Grímsstöðum og í Reykjavík.

Að sögn Þóris Hrafnssonar, upplýsingafulltrúa iðnaðarráðuneytis, hafa fjórir aðilar þegar fengið ívilnanir á grundvelli laganna en þeir eru aflþynnuverksmiðja Becromal á Akureyri, kísilmálmverksmiðja Thorsil, sem áformuð er á Húsavík með kanadískum fjárfestum, kísilverksmiðja í Helguvík, sem bandarískir fjárfestar standa á bak við, og gagnaver Verne Holding á Keflavíkurflugvelli.

Auk umsóknar Nubos liggja sex aðrar umsóknir um ívilnanir fyrir, samkvæmt upplýsingum iðnaðarráðuneytis, en þær fara allar til umsagar ívilnananefndar sem gerir tillögu til ráðherra um afgreiðslu.