Tæplega níræður maður grunaður um líknardráp

Tæplega níræður maður var handtekinn á þriðjudaginn í San Diego í Bandaríkjunum. Hann er grunaður um að hafa orðið valdur að dauða eiginkonu sinnar.

Hinn 88 ára gamli Alan Purdy er grunaður um líknardráp. Hann hafði hugsað um eiginkonu sína síðustu ár en hún var afar veik. Hún var 84 ára gömul.

Á þriðjudaginn fannst Margaret látinn á heimili þeirra í San Diego. Strax vaknaði grunur um að Alan hafi orðið valdur að dauða hennar.

Talið er að Margaret hafi kafnað en hún var með plastpoka yfir höfði sínu. Alan var færður í varðhald, grunaður um líknardráp. Honum var þó sleppt stuttu seinna gegn tryggingu.

Tengdasonur Alans og Margaret, John Munster, sagði AP fréttastofunni að þetta hafi ekki verið í fyrsta skiptið sem Margaret hafi reynt að svipta sig lífi.

„Hún talaði oft um að sársaukinn gerði líf hennar óbærilegt," sagði Munster. „Þau áttu ánægjulegt líf saman og ég mun sakna hennar. Ég ætla ekki að efast um ákvörðun hennar."

Alan og Margaret höfðu þurft að annast hvort annað í áraraðir. Heyrn Alans var að mestu farin og Margaret þjáðist af mörgum kvillum.

Ættingjar þeirra segja að þau hafi verið mestu mátar og hafi ávallt gengið hönd í hönd.

Rannsókn stendur nú yfir á málinu. Ekki er vitað hvort að Alan verði ákærður.