Eyrnasneplarnir teygjanlegir

Bassaleikarinn Hólmkell Leó Aðalsteinsson skartar 30 millimetra kefli í eyrnasneplunum og viðurkennir að móðir sín sé ekki hrifin af uppátækinu.

Tíska „Þetta var mjög vont til að byrja með en svo venst þetta. Eyrnasneplarnir er svo teygjanlegir,“ segir Hólmkell Leó Aðalsteinsson, bassaleikari í hljómsveitinni Endless Dark, sem er með 30 millimetra kefli í eyrunum, eða svokölluð „tunnel“.

Hólmkell hefur vakið athygli fyrir stærð gatsins í eyrnasneplunum enda eru þau óvenju stór. Hann kveðst oft hafa verið stoppaður út á götu og og finnur að fólk glápir á sig, án þess að kippa sér mikið upp við það.

Hólmkell hóf stækkunarferlið á gatinu árið 2010 með því að fá sér venjulegat gat í eyrað. „Ég byrjaði að fá mér gat í eyrað og svo stækkaði ég það jafnt og þétt. Fyrstu 10 millimetrarnir voru sársaukfyllstir.“

Ekki þykir æskilegt að stækka gatið nema um 2 millimetra í einu og verða að líða að minnsta kosti tvær vikur á milli stækkunar. „Maður verður að leyfa bólgunni að hjaðna inn á milli því ef maður gerir það ekki þá kemur bara blóð og vesen. Þetta er þolinmæðisverk,“ segir Hólmkell og kveðst ekkert finna fyrir gatinu núna. „Þetta verður auðveldara því þyngri sem lokkaranir verða en nú er ég hættur að stækka í bili. Það samt kitlar alltaf að gera gatið aðeins stærra.“

Bassaleikarinn viðurkennir að fjölskyldan sín sé ekki alltof hrifin af uppátækinu og þá sérstaklega móðir hans. „Ég var með útstæð eyru sem barn og fór í aðgerð til að laga það á sínum tíma. Mömmu finnst synd að ég skuli vera að eyðileggja á mér eyrun.“

Hólmkell þarf einmitt að fara í lýtaaðgerð til að laga gatið ef hann ákveður að fjarlægja keflið úr eyranu í framtíðinni. „Það fer náttúrulega eftir því hvað maður tekur sér fyrir hendur í framtíðinni en ég held að ég láti nú laga á mér eyrum eftir svona 10 ár eða þegar ég verð pabbi.“

alfrun@frettabladid.is