Slást um að kaupa gull af Íslendingum

Slegist var um að kaupa gull af Íslendingum á hóteli í Reyjavík í dag. Gullkaupmenn segja óvenjumarga vera að reyna að selja dýrgripina sína.

Það var nóg um að vera á Grand hótel Reykjavík í dag. Á þremur hæðum hótelsins höfðu gullkaupmenn hreiðrað um sig og reyndu að fá Íslendinga til að selja sér gull.

Á neðstu hæðinni var Mark Nangle breskur gullkaupmaður. Þetta er í annað sinn á stuttum tíma sem hann kemur til landsins. Í síðustu viku keypti hann skartgripi af Íslendingum fyrir um átta milljónir.

Á efstu hæð hótelsins tók svo Sverrir Einar gullkaupmaður á móti fólki

"Fólk er að koma með allskonar gull. Bæði brotagull, gamalt gull, gullskartgripi sem eru komnir úr tísku, gamla trúlofunarhringi og svo framvegis," sagði Sverrir Einar Eiríksson, gullkaupmaður.

Á þrettándu hæð hótelsins tóku starfsmenn úr- og skartgripaverslunarinnar Jón og Óskar á móti fólki. Þar á bæ kaupa menn gull allt árið en þeir vildu minna á sig með að vera á hótelinu í dag. Gullið sem keypt er notað til að smíða úr.

Fjölmargir lögðu leið sín á hótelið til að sjá hvað þeir gátu fengið fyrri gullið sitt. Enginn þeirra var þó tilbúinn að ræða við fréttastofu.

Heimsókn breska gullkaupmannsins í síðustu viku vakti nokkra athygli þegar ljós kom að hafði keypt smíðisgripi og ætlaði að flytja þá út til bræðslu. Þjóðminjavörður mætti á staðinn í dag til að fylgjast með hvort að eitthvað slíkt væri nú á ferðinni.

„Það er auðvitað ábyrðarhluti að flytja úr landi hluti sem að markvisst á að bræða niður og þar með eyðileggja og þess vegna erum við sérstaklega vakandi yfir þessum auglýsingum þar sem verið er að auglýsa eftir gulli og silfri til útflutnings og niðurbræðslu því þar erum við kannski að glata menningarverðmætum," sagði Margrét Hallgrímsdóttir, þjóðminjavörður og formaður safnaráðs.