Bleikt.is 2 ára

Lífið heyrði stuttlega í Hlín Einarsdóttur stofnanda og ritstjóra vefsvæðisins Bleikt.is sem er tveggja ára. Ritstjórinn er þakklátur á þessum tímamótum og heldur áfram að leggja sig fram við að koma góðu til leiða.



Gengið vonum framar

Til hamingju að nú eru tvö ár síðan þú stofnaðir Bleikt.is. Hvernig hefur gengið? Takk kærlega fyrir. Það hefur gengið vonum framar og vefurinn verið einn vinsælasti vefur landsins síðan hann var stofnaður. Við höfum gengið í gegnum allskonar tímabil, slípast til og lært ótrúlega mikið. Það sem er efst í huga akkúrat núna er bara þakklæti. Ég er ofboðslega þakklát okkar tryggu lesendum og þakklát fyrir að hafa fengið tækifæri til að spreyta mig á þessum vettvangi. Þetta er án efa skemmtilegasta vinna í heimi.

Kemur góðu til leiðar

Hvað hefur þú lært um netnotkun landans á þessum tveimur árum? Lesendur okkar eru af báðum kynjum þó konur séu í meirihluta. Þeir eru nýjungagjarnir, ofsalega fljótir að taka eftir góðu efni og vita alveg hvað þeir vilja. Margir hafa sýnt okkur mikið traust og við erum vettvangur ungs fólks að koma sér á framfæri, margir hafa sent okkur lífsreynslusögur, til dæmis um eigin reynslu af einelti og þess háttar, sem við erum mjög þakklát fyrir, því við viljum alltaf koma góðu til leiðar og helst stuðla að viðhorfsbreytingu í samfélaginu.

Hvert stefnið þið? Við stefnum ótrauð áfram að gleðja, fræða og skemmta. Við viljum vera til staðar fyrir lesendur og halda áfram að bjóða upp á skemmtilegt, sniðugt og frábært efni.

Ég er bara mjög þakklát á þessum tímamótum. Við vöxum enn og döfnum þrátt fyrir síaukna samkeppni og það er sérstaklega ánægjulegt.

Bleikt.is