Vidic gæti snúið aftur í næstu viku

Sir Alex Ferguson, stjóri Manchester United, segir að miðvörðurinn Nemanja Vidic gæti verið klár í slaginn gegn Cluj í Meistaradeild Evrópu í næstu viku.

Reiknað var með því að Vidic, sem hefur verið frá keppni vegna hnémeiðsla síðan í september, myndi snúa aftur á völlinn í kringum jólin. Endurhæfing kappans hefur gengið betur en vonir stóðu til og Ferguson segir að það kæmi honum ekki á óvart ef Vidic spilaði gegn Cluj.

„Góðir varnarmenn vinna deildina. Það væri gaman að sjá hann spila í Meistaradeildinni gegn Cluj á miðvikudag," segir Ferguson en leikurinn er þýðingarlaus fyrir United sem þegar hefur tryggt sér sigur í riðlinum.

Síðan Vidic fór meiddur af velli í 1-0 sigri á Galatasaray 19. september hefur United spilað sextán leiki. Í aðeins tveimur þeirra hefur liðinu tekist að halda hreinu.

Ferguson tjáði sig einnig um meiðsli portúgalska kantmannsins Nani.

„Nani verður frá í fjórar til fimm vikur til viðbótar," sagði Ferguson. Hann staðfesti einnig að United yrði án Antonio Valencia þegar liðið mætir Reading á útivelli á morgun.