Minntust þeirra sem létust í umferðarslysi

Þeirra var minnst í morgun, sem látist hafa í umferðarslysum. Athöfn var haldin við bráðamóttöku Landspítalans í Fossvogi en Sameinuðu þjóðirnar hvetja aðildarríki til að halda slíka athöfn þriðja sunnudag í nóvember ár hvert. Hér á landi er það starfshópur innanríkisráðuneytis og velferðarráðueytis um áratug aðgerða í umferðaröryggismálum sem skipuleggur athöfnina en í honum sitja einnig fulltrúar ýmissa aðila sem starfa að umferðaröryggismálum.

Ólafur Ragnar Grímsson, forseti Íslands var viðstaddur athöfnina í morgun, auk fulltrúa björgunarsveita, lögreglu og heilbrigðiskerfis og aðstandenda sem misst hafa ástvini í umferðarslysum. Ólafur Ragnar Grímsson sagði í ávarpi við athöfnina að mikill fjöldi þeirra sem látist hafa og slasast í umferðarslysum ættu að vera okkur hvatning til að halda áfram á braut kynningar, fræðslu og hvatningar í umferðaröryggisaðgerðum.

Ólafur Ragnar lauk svo máli sínu með því að boða einnar mínútu þögn í minningu þeirra sem látist hafa í slysum og hvatti viðstadda jafnframt til að leiða hugann að þeim sem slasast hefðu með þakklæti fyrir þær fjölmörgu starfsstéttir sem sinna aðgerðum og meðferð þegar slys verða.

Nánar er fjallað um málið á vef Stjórnarráðsins.