Fjölskylda Inga niðurbrotinn vegna ákvörðunar skólayfirvalda

Faðir Inga Kristmanns, sem neitað var um skólavist í Klettaskóla, segir fjölskylduna niðurbrotna. Menntamálaráðuneytið hefur staðfest ákvörðun Klettaskóla um að synja Inga Kristmanni, sem er ellefu ára gamall, fatlaður drengur um skólavist.

Ingi er með væga þroskahömlun, hreyfiþroskaröskun og ofvirkniröskun. Foreldrar hans sóttu um vist fyrir hann í sérskólanum Klettaskóla í apríl en fengu synjum hálfum mánuði síðar.Þau kærðu málið til menntamálaráðuneytisins sem staðfesti synjunina í gær.

Ágúst Kristmanns, faðir Inga, er afar ósáttur. "Við erum náttúrulega mjög döpur yfir því að þau taki þá afstöðu að hann eigi ekki heima í sérskóla og urðum hreinlega niðurbrotin við að lesa rökstuðninginn sem fylgir niðurstöðunni," segir Ágúst Kristmanns.

Hann segir þar vera tvennt sem stingi þau mest. Annars vegar er þeim hafnað á þeim forsendum að ekki hafi verið staðið rétt að umsóknarferlinu í upphafi, en þau sóttu sjálf um til skólans í stað þess að sækja um til sveitarfélagsins.

"Við vorum að heyra þetta í fyrsta skipti í gær. Svo les menntamálaráðuneytið það út úr greiningu Inga frá 2007 að hann sé ekki fatlaður samkvæmt lögum, sem er mjög skrýtið því hann hefur verið fatlaður frá því hann var þriggja ára," segir Ágúst.

Ágúst segir skóla án aðgreiningar ekki virka fyrir son sinn, sem nú er í almennum skóla en fær aðstoð þroskaþjálfa.

"Hann er orðinn mjög einangraður félagslega og er löngu hættur að eiga samleið með jafnöldrum sínum í skólakerfinu. það eru stöðug aukin vandamál heima fyrir og hann vill ekki ifara í skólann," segir Ágúst.

Foreldrar Inga stefna á að kæra úrskurð ráðuneytisins til umboðsmanns Alþingis. Við ætlum líka að fá betur útlistað hvað er fötlun og hvað er ekki fötlun," segir hann.