Matnum haldið heitum í fjóraklukkutíma

Hádegismatur nemenda í tveimur grunnskólum í Kópavogi er eldaður í Reykjanesbæ og þegar þeir síðustu setjast að snæðingi hefur honum verið haldið heitum í um fjórar klukkustundir. Næringar- og matvælafræðingur segir fyrirkomulagið bjóða hættunni á matarsýkingu heim.

Níu grunnskólar eru í Kópavogi, í fimm þeirra er matur eldaður frá grunni og í tveimur er hann hitaður á staðnum. Til tveggja, Kársnes- og Snælandsskóla, er maturinn hins vegar sendur fulleldaður frá fyrirtækinu Skólamat í Keflavík og það þykir Jóhönnu Torfadóttur sem á börn í Snælandsskóla slæmt.

„Það sem ég hef áhyggjur af sem matvæla- og næringarfræðingur er að þetta er löng leið sem verið er að keyra matinn. Það þarf að byrja að hita hann væntanlega á milli átta og níu á morgnana. Börnin eru að koma í mat á milli 11 og 12:30 þannig að það geta liðið næstum því fimm tímar sem verið er að halda matnum heitum," segir Jóhanna Eyrún Torfadóttir, matvæla- og næringarfræðingur.

„Það þarf að passa rosalega vel keðjuna. Það þarf að passa að hitinn detti ekki niður í bílnum eða á meðan hann er að bíða þar sem hann er tekinn inn í skólanum. Það þarf að fylgjast með hitaborðunum, það þarf að tryggja þetta rosalega vel því að þegar hitastigið fer undir 60 gráður þá geta farið að fjölga sér ákveðnar bakteríur í matnum."

Jóhanna benti skólayfirvöldum fyrst á þessa hættu árið 2006 en þá starfaði hún sem ráðgjafi hjá skólamötuneyti Reykjavíkurborgar.

„Þar settum við viðmið að það mætti ekki halda mat heitum lengur en í 2 tíma, það væri algjört hámark."

Aðstæður í mötuneyti skólanna eru ófullnægjandi að mati Kópavogsbæjar og þess vegna þarf að breyta húsnæði skólanna til að hægt sé að elda þar mat frá grunni en að sögn upplýsingafulltrúa bæjarins hefur engin ákvörðun um slíkt verið tekin. Jóhanna telur mjög brýnt að það verði gert hið snarasta.

„Börn eru náttúrulega ekki með sterkt ónæmiskerfi eins og fullorðið fólk og það sama á við um eldra fólk, það er ekki með sterkt ónæmiskerfi. Þannig að þeim er hættara við að fá matarsýkingu, ef það er eitthvað byrjað að fjölga sér þá eru þau viðkvæmari fyrir," segir Jóhanna Eyrún að lokum.