Hamingjusamur með útihurðina

Bergþór Pálsson, söngvari



Hvað ert þú helst að fást við þessa dagana?



Eins og venjulega er ég að sýsla við undirbúning á hinum og þessum tækifærissöng við brúðkaup, jarðarfarir, afmæli o.s.frv. Auk þess þarf ég alltaf að hugsa til lengri tíma, í augnablikinu er ég að vinna í dagskrá fyrir tónleika í Washington í vor. Auk þess kenni ég svolítið.

Stendur þú í einhverjum framkvæmdum á heimilinu eða hefur nýlokið við?

Varla er hægt að kalla það framkvæmdir, en fyrir skömmu málaði ég útidyrahurðina í sænskrauðum lit og er býsna hamingjusamur með það.

Ertu duglegur að breyta og bæta heima við?

Ég held að undirmeðvitundin sé alveg að fara að ákveða dag til að fara í geymsluna. Það er með ólíkindum hvað maður getur safnað að sér drasli sem engin not eru fyrir, en af einhverjum óskiljanlegum ástæðum hummar maður alltof oft fram af sér að ráðast á það. Eins og það er nú gaman þegar það er búið! Mér finnst gaman að færa til húsgögn og skipta út skrautmunum (sem stundum finnast í geymslunni þegar maður lagar þar til!), en ég er samt tiltölulega ánægður með fyrirkomulagið eins og það er.

Er einhver hlutur sem þig langar sérstaklega mikið í þessa dagana?

Ég ríf oft í hár mér þegar ég er að reyna að ná sléttri plastfilmu úr pakkanum, þannig að mig langar í plastrúllu upp á vegg, en hef ekki fundið. Þar sem ég á afmæli í dag, verður mér kannski að ósk minni (er ekki hægt að síkríta svona?).

Hver er uppáhaldshluturinn þinn í eldhúsinu?

Sítrónupressan fína. Sítrónuvatn er undrameðal sem heldur mér kraftmiklum, meðan kaffi gerir mig slappan og þreyttan.

Hver er uppáhaldsstaðurinn þinn á heimilinu?

Hornið í sjónvarpssófanum þar sem ég vinn alltaf ýmislegt í höndum og anda niður í kvið til að reyna að halda jafnvægi í lífsins ólgusjó, meðan sjónvarpið malar. Oft skrúfa ég samt niður í því. Stundum skiptir maður um stöð, en ánægðastur var ég þegar ég uppgötvaði að ég gat hlustað á Rás 1 í sjónvarpinu. Það er svo heimilislegt!