Frægur Frakki í Fríkirkjunni

Frakkinn Yoann Lemoine, sem er heimsþekktur leikstjóri tónlistarmyndbanda, hefur nýlokið upptökum á einu slíku hér á landi. Það var tekið upp fyrir hans eigið tónlistarverkefni þar sem hann kemur fram undir nafninu Woodkid.

Upptökur á myndbandinu stóðu yfir í þrjá daga og fóru meðal annars fram í Fríkirkjunni í Reykjavík og við Dyrhólaey. Með aðalhlutverk fór rússneska karlfyrirsætan Matvey Lykov sem hefur starfar mikið fyrir Gucci.

Tökurnar í Fríkirkjunni fóru fram á föstudag og tóku þær sextán klukkustundir. Um þrjátíu Íslendingar voru í aukahlutverkum í myndbandinu og þótti Lemoine mjög nákvæmur við tökurnar.

Á ferilskrá hans er myndband við lagið Born To Die sem hann gerði fyrir Lönu Del Rey og lagið Take Care sem hann tók upp fyrir rapparann Drake með Rihönnu sem gestasöngvara.

Fyrr á árinu var Lemoine tilnefndur til sex MTV-verðlauna fyrir þessi tvö myndbönd, bæði fyrir besta myndbandið og bestu listrænu stjórnina. Í síðarnefnda flokknum var hljómsveitin Of Monsters and Men tilnefnd fyrir myndband við lagið Little Talks.

Lemoine hefur einnig getið sér gott orð fyrir myndbönd við lögin Teenage Dream með Katy Perry og Back to December með Taylor Swift.

- fb