Aldursbilið hverfur í skemmtilegum félagsskap

Linda Baldvinsdóttir og Jóna Björg Sætran eru konurnar að baki markþjálfunarfyrirtækinu Coaching Camp ehf. Þær standa fyrir sérstökum kvennahelgum einu sinni til tvisvar á ári.

"Markþjálfun snýst um að horfa á hindranir sínar og tækifæri og taka ákvarðanir með það að sjónarmiði að ná framúrskarandi árangri í lífi og starfi," segir Linda Baldvinsdóttir, markþjálfi og formaður Félags markþjálfunar á Íslandi.

Markþjálfun er fremur ung grein en hefur þó slegið í gegn um allan heim. "Fyrirtæki erlendis leggja oft mikið kapp á markþjálfun og stjörnurnar í Hollywood eiga allar sinn markþjálfa," útskýrir Linda. Hún segir mögulegt að sækja markþjálfun í einstaka skipti til að tækla ákveðin málefni, en margir eigi þó sinn persónulega þjálfa sem þeir hitta reglulega. Að sögn Lindu er enginn sérstakur markhópur í markþjálfun því karlar og konur á öllum aldri sæki í hana. "Við erum alltaf með rosalega breiðan og fjölbreyttan hóp," segir hún.

Einu sinni til tvisvar á ári stendur fyrirtæki Lindu, Coaching Camp, fyrir konuhelgum þar sem farið er að Frumskógum í Hveragerði og andi og sál ræktuð. Næsta slík helgi verður haldin dagana 16. til 18. nóvember. "Þetta er algjör dekurhelgi í skemmtilegum félagsskap, þar sem við borðum góðan mat og kynnumst öðrum frábærum konum á sama tíma og við kynnumst okkur sjálfum betur," segir Linda og minnist á hóp kvenna sem kom saman á slíkum viðburði fyrir þremur árum og er enn í sambandi í dag. "Það myndast svo sérstakur andi á þessum helgum hjá okkur að það ná allir saman og aldursbilið hverfur alveg," bætir hún við, en konum á öllum aldri er velkomið að taka þátt. Linda segir enn ekki neinar karlahelgar hafa verið haldnar en það sé þó í skoðun, rétt eins og hjónahelgar.