Grét í hárgreiðslustólnum

Bandaríska leikkonan Tia Mowry eignaðist sitt fyrsta barn í fyrra. Þá lofaði hún sjálfri sér að hún myndi klippa sig stutt en þegar í stólinn var komið helltust alls kyns tilfinningar yfir hana.

"Mig hefur langað að klippa á mér hárið síðan ég var sextán eða sautján ára. Ég hugsaði með mér að ég myndi klippa mig þegar ég myndi eignast barn. Ég er mamma núna og ég sé heiminn öðruvísi. Þannig að ég ákvað að prófa eitthvað nýtt og losa mig við hárið," segir Tia.

Þegar í hárgreiðslustólinn var komið nú á dögunum byrjaði Tia hins vegar að gráta.

"Ég var ekki með spegil fyrir framan mig þegar hárgreiðslukonan mín klippti mig. Ég sá bara hárlokka falla á gólfið og ég byrjaði að gráta af því að ég tengdi svo margt við hárið á mér. En þegar ég leit í spegil leið mér eins og nýrri manneskju."