Ráðherra leitar að dagmömmu

Katrín Júlíusdóttir alþingismaður og iðnaðarráðherra er væntanleg aftur til starfa úr fæðingarorlofi með haustinu. Alþingi verður sett aðra vikuna í september og eftir því sem Vísir kemst næst ætlar Katrín að taka þátt í þingstörfum af fullum krafti. Til marks um það auglýsti Katrín eftir dagmömmu á facebooksíðu sinni í gær.

Viðamiklar breytingar á stjórnarráðinu verða gerðar strax í byrjun september, sem fela meðal annars í sér að iðnaðarráðuneytið verður lagt niður. Verkefni þess munu renna inn í nýtt atvinnuvegaráðuneyti og umhverfis- og orkumálaráðuneytið. Ekki liggur fyrir hvaða hlutverki Katrínu er ætlað í nýju ríkisstjórninni. Sjálf hefur hún ekkert viljað láta uppi um málið í samtali við Vísi.