Fjöldi mála á síðustu stundu

Kaupþing höfðaði tugi riftunarmála í lok júní þegar frestur slitastjórnarinnar til að höfða slík mál rann út. Mörg málanna varða endurkaup á skuldabréfum sem slitastjórn telur að líta beri á sem endurgreiðslu skulda fyrir gjalddaga.

Fréttastofa greindi frá því í gær að slitastjórn Kaupþings krefur Vestmannaeyjabæ um endurgreiðslu á rúmum milljarði króna sem bæjarfélagið tók út úr peningamarkaðssjóði þann 8. september 2008 eða rétt fyrir hrun. Telur slitastjórnin að þar með hafi bæjarfélagið notið betri stöðu en aðrir eigendur innlána.

Vísar slitastjórnin í 134. grein gjaldþrotalaga en í henni segir meðal annars að krefjast megi riftunar á greiðslu skuldar á síðustu sex mánuðum fyrir frestdag, það er þann dag sem dómara berst beiðni um gjaldþrotaskipti, ef greitt var fyrr en eðlilegt var eða greidd var fjárhæð skerðir greiðslugetu þrotamannsins verulega.

Elliði Vignisson, bæjarstjóri í Vestmannaeyjum sagði í fréttum okkar í gær að málið væri risavaxið fyrir lítið bæjarfélag sem ekki hefði reynslu af málarekstri sem þessum. Eyjamenn myndu samt gera sjóklárt og undirbúa sig vel en búist er því því að það verði dómtekið í september. Hann sagðist spyrja sig hvort eðlilega snemmt fyrir slitastjórnina hefði verið að bíða fram yfir hrun svo peningarnir hefðu tapast.

Feldís Óskarsdóttir, formaður slitastjórnarinnar, sagði í samtali við fréttastofu að ekki væri hægt að tjá sig um einstök mál. Slitastjórnin hefði höfðaði tugi riftunarmála á síðustu vikunum það er að segja fyrir lok júní en þá rann út frestur slitastjórnar Kaupþings til að höfða slík mál. Segir hún riftunarmálin taka til ýmissa ráðstafana bankans síðustu mánuði fyrir hrun og vera byggð á ákvæðum laga um gjaldþrotaskipti. Mörg málanna varða endurkaup á skuldabréfum sem slitastjórn telur að líta beri á sem endurgreiðslu skulda fyrir gjalddaga en önnur mál varða endurheimtu á öðrum grundvelli.