Tveggja ára á leið í sína fjórðu hjartaaðgerð

Þrátt fyrir að vera einungis tveggja og hálfs árs hefur Matthildur Haraldsdóttir gengist undir þrjár stórar hjartaaðgerðir og er útlit fyrir að sú fjórða verði gerð á næstu dögum. Vinir hafa tekið höndum saman og stefna á að halda styrktartónleika í tveimur löndum.

Matthildur fæddist í Salzburg í Austurríki í desember 2009. Fljótlega kom í ljós að hún væri með afar flókinn og sjaldgæfan hjartagalla og gáfu læknar litla sem enga von um að hún myndi komast í gegnum fyrstu dagana. Sú stutta barðist hetjulega fyrir lífi sínu og hafði betur en ljóst var frá fyrsta degi að hún þyrfti að gangast undir þrjár stórar hjartaaðgerðir.

„Hún fór í þriðju stóru hjartaaðgerðina 11.júlí síðastliðinn. Auðvitað vonuðum við öll að hún myndi ganga snuðrulaust fyrir sig en það var ekki raunin," segir Guðbjörg Sandholt, fjölskylduvinur.

Endurtaka átti stóru aðgerðina í gær en henni var frestað um nokkra daga þar sem Matthildur reyndist ónæm fyrir ákveðnum lyfjum.

„Í fyrradag þá vorum við ansi hrædd um Matthildi en hún kom samt öllum á óvart í gær þegar hún borðaði með foreldrum sínum. Hún semsagt vaknaði og var tekin úr öndunarvél sem hún er búin að vera í núna í nokkra daga, það var mikil áhætta, en hún andaði sjálf með smá súrefni í gegnum nefið."

Foreldrar litlu baráttuhetjunnar eru tónlistarmennirnir Haraldur Ægir Guðmundsson og Harpa Þorvaldsdóttir en auk Matthildar eiga þau dótturina Halldóru sem er níu ára gömul en fjölskyldan býr í Salzburg.

„Hún hefur sýnt fram á að hún er mikil baráttukonu, alveg frá fyrstu stundu."

Vinir fjölskyldunnar hafa tekið sig saman og ætla að halda nokkra styrktartónleika bæði hér heima sem og í Austurríki og verða þeir auglýstir síðar.

„Ef fólk vildi styðja við bakið á fjölskyldunni í þessum aðstæðum. Það er náttúrulega nóg að hafa áhyggjur af barninu, að maður þurfi ekki líka að svitna yfir fjárhagsstöðunni og hafa áhyggjur af því. Það tekur ákveðinn þunga í burtu og það er þess vegna sem við erum að reyna að vekja athygli á stöðunni," segir Guðbjörg að lokum.

Reikninsnúmer til styrktar Matthildi hér að neðan:

Rn. 0159-05-403600

Kt.160580-5429