Brot Vítisenglanna varða allt að sextán ára fangelsi

Brotin sem Einar Ingi Marteinsson og aðrir aðilar tengdum Vítisenglum eru grunaðir um að hafa framið gegn konu í desember síðastliðnum eru talin varða allt að sextán ára fangelsi. Þeir eru grunaðir um að hafa ráðist inn á heimili konu og beitt hana alvarlegu ofbeldi svo hún hlaut áverka af. Þetta kemur fram í gæsluvarðhaldsúrskurðum Hæstaréttar frá því á föstudag sem voru birtir á vef Hæstaréttar í dag.

Þar staðfesti Hæstiréttur gæsluvarðhaldsúrskurði Héraðsdóms Reykjaness yfir þremur mönnum sem grunaðir eru um aðild að árásinni. Hæstiréttur úrskurðaði jafnframt Einar Marteinsson í áframhaldandi gæsluvarðhald til 18. júní næstkomandi, en það er lokafrestur fyrir Héraðsdóm Reykjaness að kveða upp dóm í málinu.

Héraðsdómur Reykjaness hafði áður úrskurðað að Einar skyldi látinn laus úr gæsluvarðhaldi og var sá úrskurður byggður á því að fyrir lægi að Einar hefði ekki verið staddur á brotavettvangi þegar brotið var framið.