Segja Þjóðhátíð vera best skipulögðu útihátíð landsins

Þjóðhátíð Vestmannaeyja er best skipulagða útihátíð landsins sem ÍBV er mjög stolt af, segir félagið í yfirlýsingu vegna hvatningaverðlauna Feministafélags Íslands sem ÍBV fékk afhent í dag. ÍBV hefur veg og vanda að skipulagningu Þjóðhátíðar ásamt fleiri aðilum. Í tilkynningu sem Feministafélagið sendi þegar tilkynnt var um handhafa hvatningaverðlaunanna í dag er tekið fram að fimm nauðganir hafi verið tilkynntar eftir síðustu Þjóðhátíð í Eyjum en ekki sé hægt að reikna með að sú tala sé endanleg.

„ÍBV Íþróttafélag mun leggja áherslu á að berjast gegn hvers konar ofbeldi hvort sem er á Þjóðhátíð eða annars staðar og vill sérstaklega taka undir áréttingu Feministafélagsins að ábyrgð á ofbeldi hvílir hjá ofbeldismanninum einum. Það er hins vegar ÍBV að sjá til þess að gæsla og aðbúnaður sé til staðar á Þjóðhátið og það hefur verið og mun áfram vera til fyrirmyndar á Þjóðhátíð," segir ÍBV í yfirlýsingu.

ÍBV segir að verðlaun Feministafélags Íslands sé mikill heiður fyrir ÍBV og Þjóðhátíðarnefnd og viðurkenning fyrir gott starf en um leið hvatning til að gera enn betur. ÍBV og Þjóðhátíðarnefnd þakki fyrir þennan heiður og muni hér eftir sem hingað til í engu gefa eftir í baráttu fyrir jafnrétti á öllum sviðum.