Veiðigjöldin munu hækka á næstu árum

Jóhanna Sigurðardóttir forsætisráðherra segir það rangt sem fram hafi komið i fjölmiðlum að fyrirhuguð lög um veiðigjöld muni aðeins gilda í eitt ár og að fjárfestingaáætlun ríkisstjórnarinnar sé í uppnámi.

Jóhanna segir að þvert á móti muni veiðigjöldin verða stig vaxandi á næstu árum verði fyrirliggjandi lagafrumvarp samþykkt eins og samkomulag um þinglok geri ráð fyrir. Miðað við óbreytta afkomu sjávarútvegsins megi því gera ráð fyrir að arður þjóðarinnar af fiskveiðiauðlindinni verði um 1% af landsframleiðsu næstu árin, eða 40-50 milljarðar á næstu þremur árum eins og áætlanir stjórnvalda gerðu ráð fyrir.

Jóhanna segir að með þessari niðurstöðu hafi forsendur fjárlaga, langtímaáætlunar í fjármálum ríkissjóðs og fjárfestingaráætlunar ríkisstjórnarinnar 2013-2015 verið tryggðar hvað varðar tekjur af veiðigjöldum.