Fíkniefnasali í átján mánaða fangelsi

Hæstiréttur Íslands staðfesti niðurstöðu Héraðsdóms Norðurlands eystra gegn karlmanni sem var sakfelldur í október á síðasta ári fyrir stórfellt fíkniefnamisferli.

Maðurinn var dæmdur í átján mánaða fangelsi fyrir áfengis- og fíkniefnalagabrot með því að hafa tekið við samtals einu kílói af amfetamíni og 400 grömmum af hassi og haft í vörslum sínum og selt hluta fíkniefnanna.

Þá var hann einnig fundinn sekur um að hafa ræktað 24-26 kannabisplöntur sem gáfu af sér 200-300 grömm af kannabis sem maðurinn seldi. Hann var einnig fundinn sekur um að hafa framleitt 15 lítra af landa sem hann seldi.

Manninum var talið til tekna að hann játaði brot sín skýlaust og leitaði sér hjálpar vegna vímuefnaneyslu sinnar. Þó var ekki hægt að líta fram hjá alvarleika brotanna og var niðurstaðan því staðfest.