Raunhæft að leggja einkabílnum

Borgarstjóri segir eflingu almenningssamgangna á höfuðborgarsvæðinu gefa fólki raunhæfan kost á að leggja einkabílnum. Vonast er til að tilraunaverkefni sem skrifað var undir í dag komi til með að fjölga strætisvagnafarþegum verulega.

Sveitarfélögin á höfuðborgarsvæðinu, Vegagerðin, fjármála- og innanríkisráðherra undirrituðu í dag samkomulag um eflingu almenningssamgangna á höfuðborgarsvæðinu. Um tilraunaverkefni er að ræða en ríkið mun verja í það milljarði á ári næstu tíu árin. Í dag eru um fimm prósent af þeim ferðum sem farnar eru á höfuðborgarsvæðinu farnar með strætó. Vonast er til að verkefnið verði til þess að fjölga strætófarþegum verulega.

„Við munum tvöfalda hlut almenningssamgangna á höfuðborgarsvæðinu og það mun náttúrulega breyta gríðarlega miklu fyrir höfuðborgarbúa á öllum sviðum. Það mun draga úr mengun og það mun líklega minnka bílaumferð og gefa fólki kannski raunhæfan kost á því að reka ekki sinn eigin bíl heldur notast eingöngu við almenningssamgöngur," segir Jón Gnarr borgarstjóri í Reykjavík.

Farþegar ættu að sjá fyrstu breytingarnar strax í júní.

„Við munum auka tíðni einkum svona seinni part dags og fram á kvöld. Við munum hefja akstur fyrr á morgnana og um helgar og aka lengur á kvöldin, líka um helgar og virka daga. Síðan munum við fá einhverjar nýjar leiðar svona þegar fram líða stundir og vistvæna vagna", segir Reynir Jónsson framkvæmdastjóri Strætó.