Risavaxinn málmbútur féll til jarðar í Síberíu

Rúmlega 200 kílóa málmbútur féll til jarðar í Síberíu fyrr í vikunni. Samkvæmt fjölmiðlum í Rússlandi eru sérfræðingar á vegum rússnesku geimferðastofnunarinnar að rannsaka hlutinn.

Það voru þorpsbúar í bænum Otradnesnky sem uppgötvuðu hlutinn. Hann fannst í skógarjaðri nokkrum kílómetrum utan við bæinn. Hann var færður í þorpið og voru sérfræðingar kallaðir til stuttu seinna.

Eftir að lögreglumenn höfðu rannsakað hlutinn voru vísindamenn boðaðir á staðinn. Greint er frá því í rússneskum fjölmiðlum að hluturinn hafi verið færður í leynilega rannsóknarstöð.

Í yfirlýsingu frá stjórnvöldum í Moskvu kemur fram að hluturinn sé ekki af framandlegum uppruna - þó svo að þorpsbúar í Otradnesnky séu á öðru máli en þeir eru sannfærðir um að hluturinn tilheyri geimverum.

Uppruni málmbútsins er enn á huldu. Vísindamenn hafa framkvæmt fjölda rannsókna á honum en eru þó engu nær um tilurð hans. Samkvæmt vísindamönnunum er hluturinn ekki geislavirkur. Þá er málmurinn að hluta til gerður úr afar sterkri títaníum járnblöndu.

Vísindamenn segja að hluturinn tilheyri hvorki eldflaugaskeyti né geimflaug sem skotið var á loft í Kasakstan fyrir nokkrum mánuðum.