Þrjátíu veiktust í veislu í Skagafirði

Talið er að hátt í þrjátíu manns hafi veikst af matareitrun eftir að hafa borðað sjávarrétt í veislu í Skagafirði. Enginn var lagður inn á sjúkrahús en eldri maður fékk ansi svæsin einkenni.

Það var um þarsíðustu helgi sem veislan var haldin en að sögn Sigurjóns Þórðarsonar, hjá Heilbrigðiseftirliti Norðurlands Vestra greindist bakterían Clostridium perfringens í sjávarrétti sem þar var boðinn fram.

„Varð fólkið mikið veikt? Nei. Reyndar var einn eldri maður sem var meira veikur en aðrir en þetta jafnaði sig fljótt," segir Sigurjón.

Bakterían sem finnst í jarðvegi, rótargrænmeti og kryddi getur fjölgað sér á hitastigsbili allt frá 10 gráðum upp í 55.

„Veislan var haldin úti í sveit og það var þá flutningur frá Sauðárkróki á matnum og það hefur þá verið enn einn áhættuþátturinn," bætir hann við.

Bakteríurnar drepast við 80 gráður en Sigurjón segir að fólki hætti til að hita grænmeti í sjávarréttum við of vægan hita meðal annars til þess að koma í veg fyrir að eggjahvítan hlaupi í fiskinum.

„Mitt ráð er að grænmetið sé bullsoðið, eða vel hitað og eftir að því er lokið þá er lögurinn látinn kólna. Þegar hann er kominn niður í það hitastig sem æskilegt er fyrir fiskinn að þá sé fiskurinn settur út í. Þá erum við laus við alla áhættu sem að umrædd baktería olli."