Á annað hundrað manns gáfu blóð í dag

Blóðbankinn þakkar öllum þeim sem hafa gefið blóð síðan í gær. Rúmlega 200 manns hafa leitað til Blóðbankans og boðist til að gefa blóð eftir að Blóðbankinn lýsti yfir neyðarástandi vegna blóðskorts í Blóðbankanum í gær.

Í dag hafa 74 blóðgjafar gefið blóð, þar af eru 37 nýir. Blóðbankabíllinn er í Borgarnesi en þar eru komnir 36 blóðgjafar, þar af tólf nýir. Það hafa því samtals 159 gefið blóð í dag. Þess má geta að það verður hægt að gefa blóð til sjö í kvöld. Og svo verður opið frá átta til þrjú á morgun.

Nýir blóðgjafar og þeir sem ekki hafa gefið undanfarin 5 ár eru vinsamlegast beðnir að koma í næstu viku þar sem virkir blóðgjafar verða að hafa forgang í þessari viku.