Dópuð mæðgin stálu folaldalundum úr Bónus

Karlmaður gekk út úr verslun Bónus við Larsenstræti á Selfossi á laugardaginn með fangið fullt af folaldalundum sem hann hafði ekki greitt fyrir.

Starfsmaðurinn sá manninn fara inn í bifreið, en í henni voru tvær konur og var önnur þeirra undir stýri. Konan ók af stað og lenti þá utan í kyrrstæðan bíl. Starfsmaður Bónus var þá kominn á staðinn og hindraði konuna í að komast í burtu. Hún kom þá út úr bifreiðinni og karlmaðurinn, sonur konunnar, settist undir stýri og ók á brott en móðirin varð eftir. Maðurinn kom þýfinu frá sér í runna skammt frá og snéri við til að sækja móður sína. Lögreglan fann stuttu síðar bifreiðina og fólkið. Þau voru öll handtekin. Í bifreiðinni fundust fíkniefni sem tilheyrði fólkinu.

Karlmaðurinn og móðir hans viðurkenndu bæði að hafa ekið bifreiðinni undir áhrifum fíkniefna auk þess að hafa stolið kjötinu úr Bónus.