Denzel er svalari í eigin persónu en í bíómyndunum

Baltasar Kormákur segir að Denzel Washington sé svalari í eigin persónu en í bíómyndunum. Að loknum tveggja tíma fundi þeirra í Los Angeles ákvað Denzel að leika aðalhlutverk í nýjustu mynd Baltasars.

Það er eflaust óhætt að fullyrða að enginn íslenskur kvikmyndaleikstjóri hafi náð viðlíka árangri í Hollywood og Baltasar Kormákur, en frumsýning Contraband er stærsta opnun í sögu Working Title-kvikmyndaversins sem hefur framleitt á annað hundrað kvikmyndir í Hollywood.

Næsta verkefni Baltasars er leikstjórn 2 Guns fyrir Marc Platt Productions en kvikmyndin er að hluta byggð á samnefndri teiknimyndasögu eftir Stephen Grant. Um er að ræða 80 milljóna dollara verkefni, jafnvirði tæplega tíu milljarða króna, og nú hefur Baltasar tryggt sér starfskrafta einnar skærustu Hollywood-stjörnu í heimi, tvöfalda óskarsverðlaunahafann Denzel Washington sem mun leika í myndinni við hlið Mark Wahlberg.

Er hægt að komast eitthvað lengra í bransanum en þetta? „Já, það er alltaf hægt að gera betri myndir, en það er óhætt að segja að Denzel sé eitt af þessum "iconum" í amerískri kvikmyndagerð," segir Baltasar.

Denzel fékk handritið til yfirlestrar og leist vel á. Síðan var haldin sýning fyrir hann á Contraband og var hann ánægður með hana. Í síðustu viku flaug Baltasar síðan til Los Angeles m.a til að funda með kappanum. „Það var nú svona dálítið stressandi. Ég hitti hann með framleiðandanum og framleiðandinn mátti nú bara vera þarna í 15 mínútur og svo átti hann að fara," segir Baltasar.

Fundurinn var mun lengri en reiknað var með, eða tveir tímar og voru stressaðir umboðsmenn byrjaðir að hringja í tíma og ótíma. Þegar tveggja tíma fundinum lauk stóð Denzel upp, tók í höndina á Baltasar og sagði: „We'll make it happen."

En er Denzel jafn svalur í eigin persónu og í bíómyndunum? „Hann er eiginlega svalari."

Heldur sér niðri á jörðinni í faðmi fjölskyldunnar

Baltasar er með tvö önnur Hollywood-verkefni í farvatninu því Working Title Films sem framleiddi Contraband ætlar að framleiða kvikmyndirnar Everest og Víking, sem báðar verða teknar upp hér á landi að hluta, en Baltasar skrifaði handritið að síðarnefndu myndinni með Ólafi Egilssyni.

Hvernig heldurðu þér niðri á jörðinni þegar svona mikil velgengni er handan við hornið? „Bara með því að ala upp börnin. Það breytist ekkert hjá þeim. Það þarf að glíma við vesenið í skólanum ef þau eru óþekk og svo er ég að fara norður og halda áfram með lífið," segir Baltasar auðmjúkur, en hann býr ásamt fjölskyldu sinni á Hofi á Höfðaströnd í Skagafirði. Sjá má viðtal við Baltasar í myndskeiði hér fyrir ofan. thorbjorn@stod2.is