Greiddu atkvæði um allt annað en Geir Haarde

Það eru sterkar tilfinningar sem berast í brjósti þeirra sem sæti eiga á Alþingi Íslendinga eftir atburði gærdagsins. Þá felldi Alþingi frávísunartillögu sem lögð hafi verið fram á tillögu Bjarna Benediktssonar, formanns Sjálfstæðisflokksins, um að fella niður málshöfðun gegn Geir Haarde.

Eygló Harðardóttir, þingmaður Framsóknarflokksins, er stuttorð en skýrmælt um málið. „Það eru mikil vonbrigði þegar þrískiptingu valdsins er kastað út úr Alþingishúsinu en þetta varð niðurstaðan," segir Eygló í samtali við Vísi. Hún var einn þeirra þingmanna sem lögðu frávísunartillöguna fram. Hún vildi að öðru leyti ekkert tjá sig um málið en vísaði á skrif á bloggsíðu sinni.

Þar segir Eygló að hjá fæstum þingmönnum, ef einhverjum, hafi atkvæðagreiðslan snúist um Geir H. Haarde. Atkvæðagreiðslan hafi snúist um eitthvað allt annað. „Hjá sumum snérist þetta um reiði þeirra gagnvart samherjum sínum og vonbrigði með lítið breytt vinnubrögð. Skort á réttlæti. Núverandi stjórnvöld væru ekkert betri. Enn aðrir voru að spila um stöðu sína í flokknum. Ríkisstjórnina. Einhverjir voru hræddir við hvað gæti komið fram við réttarhöldin," segir hún. Eygló segir að fyrir sér hafi málið snúist um þrískiptingu valdsins, virðingu fyrir stjórnarskránni og lögum.

Segja má að þögnin um málið sé æpandi. Formenn stjórnarflokkanna hafa ekkert tjáð sig opinberlega um málið í dag. Jóhanna Sigurðardóttir forsætisráðherra sagði í samtali við RÚV í gær að hún vissi ekki hvaða áhrif málið myndi hafa á ríkisstjórnarsamstarfið. Það yrði bara að koma í ljós. Svandís Svavarsdóttir umhverfisráðherra sagði á fésbókarsíðu sinni að málið markaði þáttaskil. En hún hefur ekki útskýrt orð sín nánar.

Magnús Orri Schram og Lilja Rafney Magnúsdóttir, sem fluttu frávísunartillöguna fyrir hönd Samfylkingarinnar og VG, hafa ekki svarað símanum í dag. Hið sama er að segja um Bjarna Benediktsson, formann Sjálfstæðisflokksins.