Handtóku skammbyssumann - verður yfirheyrður

Karlmaður var handtekinn grunaður um brot á vopnalögum um miðnættið í gær. Upplýsingar höfðu borist lögreglunni um skammbyssu í hans vörslu. Maðurinn var færður á næstu lögreglustöð og síðan vistaður í fangageymslu og verður yfirheyrður frekar.

Þá fékk lögreglan tilkynningu um líkamsárás í Austurstræti rétt eftir eitt í nótt. Ungur maður kom á slysadeild í Fossvogi með brotinn úlnlið og laskaðar tennur. Sagðist hafa lent í orðaskaki við mann í Aðalstræti en síðan í Austurstræti hafi þrír menn ráðist á sig með þessum afleiðingum. Samkvæmt upplýsingum frá lögreglunni er ekki vitað hverjir stóðu að árásinni.

Þá ruddist maður inn í íbúð fyrrverandi unnustu sinnar í gær og olli skemmdum en húsráðandi var fyrrverandi kærasta mannsins og var þetta ekki í fyrsta sinn sem hann olli skemmdum hjá henni. Maðurinn var handtekinn og færður í fangaklefa.