Enn ein stormviðvörunin: Veður fer mjög versnandi suðvestanlands í kvöld

Ábending veðurfræðings fyrir kvöldið og nóttina: Veður fer mjög versnandi suðvestanlands í kvöld. Skafrenningur og takmarkað skyggni á veginum austur fyrir fjall strax um kvöldmatarleytið og hríðarveður um mest allt suðvestan og sunnanvert landið frá því seint í kvöld eða snemma í nótt.

Færð spillist fljótt við þessar veðuraðstæður. Þá er gert ráð fyrir vindhviðum 30-40 m/s undir Eyjafjöllum frá því um kl. 21 í kvöld og þar til í fyrramálið um kl. 07. Eins undir Hafnarfjalli og á Kjalarnesi frá því um miðnætti og fram undir kl. 07 í fyrramálið. Að sama skapi í Öræfasveit (Sandfell) í nótt og fram undir kl. 09.

Færð og aðstæður:

Það er hálka og skafrenningur á Sandskeiði, Hellisheiði og í Þrengslum en annars hálka, hálkublettir eða snjóþekja á flestum vegum á Suðurlandi.

Á Vesturlandi er hálka, hálkublettir eða snjóþekja á flestum vegum. Hálka og skafrenningur er á Fróðárheiði.

Á Vestfjörðum er hálka, snjóþekja og skafrenningur á flestum vegum. Flughálka er á Innstrandavegi. Þæfingsfærð og skafrenningur er á Kleifaheiði.

Á Norðurlandi vestra er hálka eða snjóþekja á flestum vegum. Snjóþekja og éljagangur er á Siglufjarðarvegi.

Á Norðurlandi eystra er hálka eða snjóþekja og þó nokkur éljagangur á flestum leiðum. Flughálka er við Bakkaflóa.

Á Austurlandi er hálka eða snjóþekja á flestum vegum. Á Suðausturlandi er hálka eða hálkublettir.