Þroskahamlaðir borga meira fyrir matinn en borgarfulltrúar

Þroskahamlaðir starfsmenn Reykjavíkurborgar greiða meira fyrir hádegismat en borgarfulltrúar og embættismenn í Ráðhúsi Reykjavíkur. Sóley Tómasdóttir, borgarfulltrúi VG, vekur máls á þessu atriði á bloggi sínu á vefsvæði Smugunnar.

„Björk Vilhelmsdóttir, formaður Velferðarráðs telur sjálfsagt að leggja gjald á máltíðir á vinnustöðum fyrir þroskahamlaða hjá Reykjavíkurborg. Hún segir þessa nýju gjaldheimtu vera í samræmi við samning Sameinuðu þjóðanna um réttindi fatlaðs fólks, að allir séu meðhöndlaðir eins. Þannig eigi fatlaðir að greiða það sama og aðrir fyrir máltíðir borgarinnar," segir Sóley á vefsíðunni.

Sóley segir að þessi röksemdarfærsla standist illa. Fyrst beri að nefna að launakjör fatlaðs fólks hjá borginni séu ekki sambærileg við launakjör ófatlaðs fólks - og þannig séu alls ekki allir meðhöndlaðir eins. Gjaldskrár vegna máltíða á vegum borgarinnar séu líka afar ólíkar eftir því hverjir eigi í hlut.

Sóley bendir á að fatlaðir greiði 610 krónur fyrir hverja máltíð á vernduðum vinnustöðum, en í Ráðhúsi Reykjavíkur greiði borgarfulltrúar og embættismenn 400 krónur fyrir hverja máltíð. Máltíðir í félagsmiðstöðvum eldra fólks séu svo seldar á 550 krónur.

Sóley segir að gjaldskrár borgarinnar séu samþykktar um leið og fjárhagsáætlun og allar ákvarðanir þar að lútandi hafi verið teknar af meirihluta Besta flokks og Samfylkingar. Það er þeirra að svara spurningum um sanngirni og jöfnuð og hugmyndafræðina að baki þessa ráðahags.