Alvarlegar truflanir á orkukerfum

Alvarlegar truflanir urðu í orkukerfum á Suðvesturlandi upp úr klukkan sex í gærkvöldi, þegar svonefndur yfirsláttur varð í búnaði í tengivirki Landsnets í Hvalfirði vegna ísingar og seltu.

Rafmagn fór af álverinu á Grundartanga í fjórar klukkustundir og lengur í Járnblendiverksmiðjunni. Rafmagnslaust varð víða á Vesturlandi, Vestfjörðum og sumsstaðar á Suðurlandi og heitavatnsdælur í Hellisheiðarvrikjun slóu út vegna raftruflana.

Það truflaði dælingu til höfuðborgarsvæðisins og um tíma í gærkvöldi var alveg heitavatnslaust í Borgarnesi, á Akranesi, í Þorlákshöfn og Ölfusi.

Þá var Hvalfjarðargöngum tvívegis lokað í gærkvöldi vegna rafmagnsleysis. Þrjú högg komu á rafkerfið, það síðasta laust fyrir háflt tíu. Notendur urðu varir við flökt á ljósum þar sem rafmagnið fór ekki alveg, og raftæki slógu jafnvel út.

Fjölmennt viðgerðarlið Landsnets og Orkuveitunnar unnu að viðgerðum fram á nótt, en upp úr miðnætti var allstaðar komið rafmagn. Fréttastofunni er ekki kunnugt um hvort tjón hlaust af þessum truflunum, nema hvað framleiðslutjón hefur orðið hjá stóriðjunni við Hvalfjörð.