Golíat aflífaður

Hundurinn Golíat, sem er þriggja ára gamall, verður tekinn af lífi samkvæmt ákvörðun úrskurðarnefndar um hollustuhætti og mengunarvarnir. Hundurinn er í eigu 45 ára gamallar konu í Garðabæ.

Konan átti Golíat og annan hund sem gengu mikið lausir í götunni við heimili þeirra og samkvæmt niðurstöðu úrskurðarnefndarinnar mun Golíat ítrekað hafa náð að glefsa í fólk. Telur úrskurðarnefndin að með þessu hafi hundurinn ógnað fólki, en ekki sé víst hvort rekja megi þá ógn til hegðunarvanda hans eða grimmdar af hans hálfu.

Nefndin telur að fyrir liggi upplýsingar um að uppeldi hundsins Golíats hafi lítið sem ekkert verið sinnt og verður það að teljast ámælisvert þegar um þriggja ára gamlan hund sé að ræða. Því beri að aflífa hundinn.