Fengu tilkynningu um hreyfingalausan mann

Lögreglumenn fara oft í útköll sem síðan reynast á misskilningi byggð en nú á dögunum fékk lögreglan tilkynningu um mann sem var sagður vera hreyfingalaus á bekk við suðurenda Reykjavíkurtjarnar.

„Lögreglan brást skjótt við enda allt eins víst að maðurinn væri í bráðri hættu. Á vettvangi var sannarlega að finna hreyfingarlausan mann á bekk og reyndist það vera hinn velþekkti Tómas Guðmundsson," segir í tilkynningu.

Það var þó ekki Tómas sjálfur sem sat á bekknum heldur var það stytta af þessu merkilega ljóðskáld.

„Þegar þetta lá ljóst fyrir héldu lögreglumennirnir til annarra verka en það skal samt áréttað að það er betra að hringja einu sinni of oft í lögregluna en einu sinni of sjaldan.

Í framhjáhlaupi má geta þess að styttan er eftir myndhöggvarann Höllu Gunnarsdóttur og að sl. föstudag voru liðin 111 ár frá fæðingu Tómasar, sem hefur oft verið kallaður Reykjavíkurskáldið. Tómas lést árið 1983 en hann er af mörgum talinn eitt af stórskáldum Íslendinga á síðustu öld," segir í tilkynningu frá lögreglu.