Tugmilljóna tjón þegar eldur kviknaði í spennistöð

Tugmilljóna tjón varð á spennuvirki í Hvalfirði eftir að eldur kviknaði þar í óveðrinu í gærkvöldi. Aðstoðarforstjóri Landsnets segir þörf á að skoða yfirbyggingu yfir spennuvirkið til að verja það fyrir salti og ísingu.

Þegar fréttastofu bar að garði mátti enn heyra snarkl í saltinu á rafmagnslíunum og brunalykt í loftinu.

Um fjörutíu slökkviliðs- og viðgerðarmenn unnu að hreinsun í morgun en sprauta þurfti vatni yfir tengivirkið til að hreinsa saltið í burtu og sáust ljósbogar alla leið til Reykjavíkur þegar eldurinn blossaði upp.

Hafið þið metið hversu mikið tjón þarna er?

„Við höfum ekki metið það ennþá, við erum byrjaður að taka það saman en það er ljóst að hleypur á einhverjum tugum milljóna," segir Guðmundur Ingi Ásmundsson, aðstoðarforstjóri Landsnets.

Hann segir það mikið áhyggjuefni að svo stór stöð slái út, viðgerð mun taka nokkurn tíma en verið sé að skoða breytingar þar á meðal að byggja annað virki innandyra.

„Í þessu tilviki var salt, krap og ís sem var sá mesti sem við höfum séð frá upphafi þessarar stöðvar, þannig það er það sem við höfum mestar áhyggjur af."

Rafmagnslaust var í álverinu á Grundartanga í þrjár klukkustundir en kerin í álverinu mega einungis vera án rafmagns í þrjár til fjórar klukkustundir áður en álið fer að storkna. Járnblendiverksmiðjan var án rafmagns í hátt í tólf klukkustundir og segir forstjórinn tjón vegna framleiðslutaps hlaupa á tugum milljóna króna.

Þá slógu heitavatnsdælur í Hellisheiðarvirkjun út vegna raftruflana og var enn unnið að því að koma eðlilegum þrýstingu á seinni partinn í dag. Rafmagnslaust var víða á Vesturlandi í dágóðastund og þurfti til dæmis að loka Hvalfjarðargöngum tvívegis. Umferðarljós og ljósastaurar í höfuðborginni slokknuðu og fundu borgarbúar fyrir flöktandi ljósum í heimahúsum þegar truflanir frá spennuvirkinu dundu á kerfið.