Styðja friðun svartfugla

Fuglavernd styður eindregið niðurstöðu meirihluta svartfuglanefndar Umhverfisráðuneytisins, sem hefur lagt til að friða eigi fimm tegundir af svartfuglum.

Fuglavernd segir að veiðar, þar með talin eggjataka, séu ekki sjálfbærar úr stofnum sem ná ekki að viðhalda stofnstærð sinni af einhverjum orsökum, til dæmis vegna fæðuskorts. Hrun í varpstofnum margra íslenskra sjófuglastofna sé staðreynd. Ástundun veiða úr hnignandi stofnun sé siðlaus umgengni við náttúruna, óháð magni veiddra fugla. Veiðibann sé eina siðlega viðbragðið við stofnhruni tegunda.

„Það hljóta að vera hagsmunir allra sem nýta svartfugla að stofnarnir séu sterkir og sjálfbærir. Öll sérhagsmunavarsla getur spillt tiltrú almennings á siðferði veiðimanna og eru ívilnanir sem þeir krefjast á fyrirkomulagi veiðistjórnunar í fullri andstöðu við varúðarreglu sem leyfir sjófuglum að njóta vafans. Svartfuglar og ekki síst lundi gefa af sér miklar tekjur vegna ferðamanna sem koma til að skoða þessa fugla og þær tekjur hverfa þegar þeir grípa í tómt," segir í ályktun Fuglaverndar.