Jens grunaður um skattsvik

Grunur leikur á að einkarekstur Jens Kjartanssonar lýtalæknis hafi ekki verið í samræmi við skattalög. Málinu verður vísað til fjármálaráðuneytisins til frekari skoðunar.

Jens Kjartansson hefur um árabil verið með stofu á Domus medica þar sem hann sinnir lýtalækningum.

Jens óskaði í gær eftir veikindaleyfi frá störfum sínum sem yfirlæknir lýtalækningadeildar Landspítalans. Í dag sinnti hann þó áfram skjólstæðingum sínum á Domus medica.

Velferðarráðuneytið hefur síðustu vikur haft innflutning og notkun PIP-sílíkonpúðanna til skoðunar. Í þeirri vinnu hefur starfsfólk ráðuneytisins fengið ábendingar um að rekstur Jens hafi ekki verið í samræmi við skattalög. Samkvæmt heimildum fréttastofu hafa komið fimm til sex ábendingar frá „þannig aðilum að framhjá þeim verði ekki litið."

Skattamál heyra hins vegar ekki undir velferðaráðuneytið. Því hefur verið ákveðið að vísa þessum hluta málsins með formlegum hætti til fjármálaráðuneytis. Verður það gert annað hvort í dag eða á morgun.

Þar verða möguleg skattalagabrot skoðuð frekar og vísað áfram til rannsóknar hjá ríkisskattstjóra ef ástæða þykir til.

Fréttastofa hefur á undanförnum dögum spurt Jens um meint brot á skattalögum en hann hefur neitað sök.

Ekki náðist í Jens nú fyrir fréttir.