Tugir ökumanna í vandræðum við Litlu kaffistofuna

Ökumenn á 20 til 30 bílum lentu í vandræðum í hálku og ófærð á nýjum vegkafla á Suðurlandsvegi fyrir neðan Litlu kaffistofuna laust fyrir miðnætti.

Þar valt breyttur jeppi á hliðina og fór allt í eina þvögu. Björgunarsveitarmenn frá Hveragerði, Reykjavík og Kópavogi voru þá kallaðir á vettvang til að greiða úr henni við erfiðar aðstæður.

Veður var þá afleitt og tók um tvær klukkustundir að greiða úr málinu. Að sögn björgunarsveitarmanna var ekkert ferðaveður á svæðinu.