Forsetahjónin fagna með drottningunni

Ólafur Ragnar Grímsson, forseti Íslands, og Dorrit Moussaieff forsetafrú munu um helgina taka þátt í hátíðardagskrá í Kaupmannahöfn í tilefni af því að 40 ár eru liðin frá því að Margrét Þórhildur varð drottning Danmerkur.

Hátíðarhöldin hefjast í Ráðhúsi Kaupmannahafnar í hádeginu á morgun og um kvöldið verða hátíðartónleikar í tónlistarhöll danska ríkisútvarpsins. Á sunnudag munu forsetahjónin fylgjast með fagnaðarathöfn í Amalienborgarhöll og sitja hádegisverð í boði Friðriks krónprins og Mary krónprinsessu. Síðdegis sækja gestir guðþjónustu í kirkju Kristjánsborgarhallar en dagskránni lýkur með hátíðarkvöldverði í Kristjánsborgarhöll.

Auk forsetahjóna munu þjóðhöfðingjar Norðurlanda taka þátt í dagskránni sem og fjölmargir aðrir gestir.