Mál Más ekki á borði Steingríms

Steingrímur J. Sigfússon segir efnahags- og viðskiptaráðuneytið ekki eiga eftir að skipta sér af deilu Más Guðmundssonar, seðlabankastjóra, og seðlabankans. Allir eigi rétt á að bera ágreining undir dómstóla.

Már Guðmundsson seðlabankastjóri hefur stefnt seðlabankanum til að fá launakjör sín leiðrétt en þegar hann tók við störfum samdi hann við bankaráð um 1575 þúsund krónur í laun á mánuði. Steingrímur J. Sigfússon, efnahags- og viðskiptaráðherra, segir Seðlabankann algerlega sjálfstæðan að þessu leyti, ráðuneytið muni ekki blanda sér í málið.

,,Þetta er á verksviði bankaráðsins og ráðuneytið hefur engin afskipti af því og á ekki að hafa."

Menn geti alltaf fengið úrlausn mála sinna.

,,Menn eiga rétt á því að fá úrlausn á slíkum ágreiningi ef ekki tekst að gera það með öðrum hætti. Þá bara hefur það sinn gang og ég ætla ekki segja neitt meira um það."

Steingrímur vildi þó ekki tjá sig um hvort honum þætti ákvörðun Más um að stefna bankanum rétt.

,,Þú færð ekkert út úr mér í þeim efnum. Við settum þessi lög á sínum tíma. Alþingi gerði það. Það var um það þá, að ég taldi, nokkuð gott samkomulag. Að það væri eðlilegt að kjörnir fulltrúar og embættismenn tækju þetta á sig. Launin voru færð niður með beinum hætti. Það stóð í tvö, reyndar hartnær þrjú ár, eins og kunnugt er þar til á dögunum féll nýr úrskurður kjararáðs. Sem þá var aftur orðið óbundið af slíkum lögþvinguðum ákvæðum. Ég tel að sú aðgerð hafi verið réttlætanleg og skynsamleg og bakka ekki frá því. Það var bæði rétt og í raun skylt að gera það sem þá var gert."

,,Hefur þú rætt þetta við Má Guðmundsson?"

,,Nei."