Vistmaður á Kleppi talinn hafa kveikt í íbúðarhúsi

Karlmaður á fertugsaldri, sjúklingur á Kleppi, er talinn hafa kveikt í íbúðarhúsi við Klepp á ellefta tímanum í gærkvöldi.

Tilkynning barst lögreglu undir hálfellefu en þá lék eldur laus í íbúðarhúsi nr. 11 við Klepp.

Íbúðin var mannlaus þegar lögregla og slökkvilið kom á staðinn. Einn af sjúklingum spítalans var handtekinn, en hann gaf þá skýringu á íkveikjunni að hún væri vegna sjúkdómstengdra ranghugmynda sinna um að eitthvað væri að í húsinu.

Maðurinn er enn í haldi lögreglu - til að tryggja öryggi hans. Talsverðar skemmdir urðu á íbúðarhúsinu.