Unnar kjötvörur auka líkur á krabbameini í brisi

Reglulegt pylsuát eykur líkur á krabbameini í brisi. Þetta er niðurstaða sænskrar rannsóknar á tengslum krabbameins við neyslu á unnum kjötvörum.

Niðurstöður rannsóknarinnar sýndu að fyrir hver 50 grömm af unnum kjötvörum sem fólk borðar daglega aukast líkurnar á krabbameini um 20 prósent. Ein pylsa inniheldur um það bil 50 grömm af unnu kjöti og því má ætla að fólk sem borðar fimm pylsur á dag tvöfaldi líkurnar á því að það veikist af krabbameini í brisi.

Greint er frá niðurstöðunum á vef Krabbameinsfélags Íslands, en þær birtust nýverið í fagtímaritinu British Journal of Cancer.

Þar kemur fram að það sé hins vegar ekki kjötið sjálft sem auki líkur á krabbameini í brisi, heldur séu það þau bæti- og rotvarnarefni sem unnar kjötvörur innihalda. Nítrít er þar sérstaklega varasamt, en þau er að finna í flestum unnum kjötvörum. Þeim er ætlað að lengja geymslutíma kjötsins og koma í veg fyrir að bótulínum-eitrun myndist í því.