"Ég svara öllum sem eru með númerið mitt"

„Ég er mjög rólegur yfir þessu en ég mun vanda til verka ef ég verð í meirihluta," segir Ómar Stefánsson, bæjarfulltrúi Framsóknarflokksins í Kópavogi.

Til tíðinda dró í dag þegar meirihlutinn í bænum féll. Það gerðist þegar Hjálmar Hjálmarsson, bæjarfulltrúi Næst besta flokksins, sagði skilið við meirihlutann. Hann studdi ekki tillögu meirihlutans um að víkja Guðrúnu Pálsdóttur bæjarstjóra úr starfi.

Nokkuð ljóst er að það þarf að mynda nýjan meirihluta í bænum en einn möguleiki er sá að Framsóknarflokkurinn komi inn í bæjarstjórn.

Hann vill ekki útiloka að hann gangi til liðs við Samfylkingu, Vinstri Græna og Lista Kópavogsbúa. „Ég svara öllum símum og ég tala við alla sem eru með númerið mitt. Ég ætla að gefa þessu tíma."

Eflaust munu einhverjir fundir verða í kvöld og segir Ómar ekki sé búið að boða hann á neinn fund. „Það er bara verið að skoða þessa hluti, stjórnmál ganga út á að það sé starfhæfur meirihluti."

Eftir síðustu kosningar fóru atkvæði svo:

Framsóknarflokkurinn er með 1 bæjarfulltrúa

Sjálfstæðisflokkurinn er með 4 bæjarfulltrúa

Samfylkingin er með 3 bæjarfulltrúa

Vinstri Grænir eru með 1 bæjarfulltrúa

Næst besti flokkurinn er með 1 bæjarfulltrúa

Listi Kópavogsbúa er með 1 bæjarfulltrúa.