Meintum ofbeldismanni úthýst af heimili sínu á Akureyri

Heimilisfaðir, sem talinn er hafa ráðist á sambýliskonu sína á Akureyri um helgina, hefur verið fluttur af heimili sínu og bannað að koma þangað í fjórar vikur. Þetta er í annað skiptið sem ofbeldismanni er vísað á brott af heimili sínu, eftir að slíkt úrræði var lögleitt fyrir hálfu ári. Á sama tíma hafa 60 konur leitað til Kvennaathvarfsins.

Kolbrún Halldórsdóttir barðist árum saman fyrir því að alþingi samþykkti þessa svokölluðu austurrísku leið svo fórnarlömb ofbeldis þyrftu ekki að flýja heimili sín - heldur yrði gerandinn fjarlægður. Hugmyndin naut ekki stuðnings fyrr en í júní í fyrra þegar Alþingi samþykkti úrræðið. Síðan lögin tóku gildi hefur þeim tvisvar verið beitt, einu sinni í höfuðborginni og nú um helgina á Akureyri.

Sú ákvörðun var tekin eftir að aðstandandi sambýlisfólks á Akureyri hringdi í Neyðarlínuna aðfararnótt laugardags og óskaði eftir aðstoð lögreglu. Þegar lögregla kom á vettvang var háreysti og læti á heimilinu, heimilisfaðirinn undir áhrifum áfengis og hafði veist að sambýliskonu sinni með höggum og spörkum. Tvö ung börn þeirra voru heima og vakandi. Maðurinn var handtekinn og daginn eftir ákvað lögregla að setja manninn í 3ja mánaða nálgunarbann og banna honum að fara heim til sín í fjórar vikur, meðal annars vegna vitneskju um að hann hefði áður beitt konu sína ofbeldi. Rjúfi menn slíkt bann ítrekað getur það varðað allt að tveggja ára fangelsi.

Ákvörðun lögreglu var tekin fyrir í Héraðsdómi Norðurlands í dag -en dómari tók sér frest til morguns til að kveða upp sinn úrskurð.

Í Reykjavík var ofbeldismaður fjarlægður af heimili sínu í október eftir að lögreglan hafði verið kvödd að heimili ungra hjóna með lítil börn þrisvar á rúmri viku. Eiginmaðurinn gaf þá skýringu á áverkum konu sinnar í þriðja skiptið að hún hefði dottið niður stiga - en konan hélt öðru fram í sjúkrabílnum á leið upp á slysadeild. Hún var marin og með áverka í andliti.

Sex og hálfur mánuður er síðan lögin tóku gildi - á því tímabili hafa 60 konur leitað til Kvennaathvarfsins og 43 börn.