Tekist á um sölu Perlunnar í borgarstjórn

Júlíus Vífill Ingvarsson borgarfulltrúi Sjálfstæðisflokksins segir að hörð umræða hafi farið fram í gærkvöldi í borgarstjórn um sölu Perlunnar og hvernig að henni hafi verið staðið.

„Á fyrstu tveimur fundum borgarráðs í byrjun desember var lögð fram tillaga um stækkun lóðar Perlunnar um 8.300 m2," segir Júlíus. „Í bæði skiptin spurði ég hvort lóðarstækkunin tengdist sölu mannvirkisins og því var svarað af formanni ráðsins að þetta tvennt tengdist ekki á nokkurn hátt. Þá óskaði ég eftir því að borgarráð fengi að sjá þau tilboð sem bárust í Perluna áður en afstaða yrði tekin til lóðarstækkunarinnar. Við því hefur ekki verið orðið en vegna þessara athugasemda minna hefur tillagan ekki verið afgreidd í ráðinu."

Tilboðsfrestur í Perluna rann út 18. október og segir Júlíus að þess hafi verið vandlega gætt að halda tilboðum leyndum en stjórnendur OR hafa undirritað viljayfirlýsingu um að vinna með tilboðsgjöfum hæsta tilboðsins. „Nú hefur komið í ljós að í því tilboði er einmitt gert að skilyrði að stækkun við lóð Perlunnar verði hluti af endanlegu samkomulagi og á þeim skika á samkvæmt teikningum að reisa 200 herbergja hótel," bætir Júlíus við.

„Á fundi borgarstjórnar gagnrýndi ég Dag B Eggertsson formann borgarráðs harðlega og dróg í efa heiðarleika hans í samskiptum við borgarráðs."

Júlíus segist ætla að leggja fram tillögu í borgarráði á morgun þess efnis að hafin verði endurskoðun á heildarskipulagi Öskjuhlíðar á grunni opinnar samkeppni um skipulag svæðisins. „Það er dýrmætt fyrir Reykvíkinga að hafa skógar og útivistarsvæði í miðri borg og það verður enn mikilvægara í ljósi stefnu um þéttingu byggðar."

„Ef heimila á ný mannvirki á í Öskjuhlíðinni verður það að gerast á grundvelli víðtækrar sáttar og heildarhugsunar."