Ósáttur við að ráðherra skyldi þurfa álit frá Umboðsmanni

Formaður sambands íslenskra framhaldsskólanema gagnrýnir að þurft hafi álit frá umboðsmanni Alþingis til að menntamálaráðherra hlustaði á nemendur. Hann segir það ánægjuefni ef hverfaskipting vegna innskráningar verður afnumin.

Menntamálaráðherra mun endurskoða fyrirkomulag við innritun í framhaldsskóla í kjölfar álits frá umboðsmanni Alþingis um að ólöglega hafi verið staðið að hverfaskiptingu. „Við framhaldsskólanemar fögnum þessu auðvitað mjög ákaft en helst af öllu held ég að það séu grunnskólanemar sem eru á ánægðastir þegar upp er staðið," segir Andri Steinn Hilmarsson.

Reglunum var breytt þannig árið 2010 að fjörutíu og fimm prósent lausra plássa í framhaldsskólum voru tekin frá fyrir nemendur sem koma úr grunnskólum í nágrenni hvers skóla.

Menntamálaráðherra hyggst kynna nýtt fyrirkomulag í febrúar.

„Að öllum líkindum verður þetta miklu betra en núverandi kerfi þar sem og þá helst að nú sitja allir, vonandi, við sama borðið þegar kemur að því að velja um menntaskóla og ekki verið að mismuna nemendum eftir skólum og búsetu," segir Andri Steinn.

Samband íslenskra framhaldsskólanema hefur frá upphafi gagnrýnd hverfaskiptinguna, og er það afstaða sambandsins að innritun nemenda í framhaldsskóla eigi að fara eftir einkunnum og getu.

„Já, mér finnst náttúrulega bara fáránlega leiðinlegt að það þurfi álit frá umboðsmanni alþingis til þess að hlustað sé á nemendur," bætir hann við.

Tveir tilvonandi útskriftarnemar úr grunnskóla kvörtuðu til umboðsmanns vegna ákvörðunarinnar ráðherra um hverfaskiptingu.. Þeir töldu að með henni væri nemendum mismunað eftir búsetu, enda stæði ekki sams konar nám til boða í öllum framhaldsskólum og því væri frelsi þeirra til náms að eigin vali skert

Umboðsmaður fellst að miklu leyti á umkvartanirnar. Ákvörðunin sé íþyngjandi fyrir nema, jafnvel þótt menntamálaráðuneytið hafi borið því við að hún hafi verið nauðsynleg til að unnt væri að tryggja öllum skólavist, lögum samkvæmt.