Borgarstjóri biður fólk um að fara varlega

Jón Gnarr borgarstjóri biður fólk um að fara varlega og hætta sér ekki út á hálar götur nema vel búið. Hann biður líka bílaeigendur um að hliðra til fyrir snjóruðningstækjum og sýna tillitssemi í umferðinni. Þetta kemur fram í yfirlýsingu frá borgarstjóra, en borgin hefur verið gagnrýnd nokkuð í dag og um helgina fyrir að salta ekki eða sanda götur fyrir vegfarendur.

„Ástandið á gatnakerfi Reykjavíkur hefur verið mjög erfitt að undanförnu. Óvenju mikill snjór hefur fallið á höfuðborgarsvæðinu, sá mesti í marga áratugi, og framkvæmdasvið borgarinnar hefur verið að glíma við afleiðingarnar af því," segir Jón í yfirlýsingunni.

Hann segir að gatnakerfið í Reykjavík sé 950 kílómetrar að lengd og beitt verði öllum hugsanlegum ráðum til að hálkuverja og ryðja götur í borginni. Hann geti fullvissað borgarbúa um að borgin sé að gera sitt besta til að greiða úr ástandinu og það sé ekki verið að spara neitt í þeim efnum.

Því er við þetta að bæta að frá því klukkan fjögur í nótt hefur verið unnið um alla borg við snjóhreinsun og hálkuvarnir gatna- og gönguleiða í samræmi við forgangsröðun í snjóhreinsun. Í húsagötum verður í dag áfram unnið með vegheflum til að ná niður hryggjum en þau tæki eru það eina sem vinnur á hörðum klakanum