Spyr um gríðarlegt tap hótela í eigu Bændasamtakanna

„Ég var búinn að biðja lengi um þetta, Bændasamtökin hummuðu þetta af sér. Það bendir margt til þess að það hafi verið að reyna að fela þessar upplýsingar, enda vita þeir upp á sig skömmina," segir Þórólfur Matthíasson, prófessor í hagfræði, í samtali við Vísir en hann skrifaði grein í Fréttablaðið í dag þar sem hann spyr Bændassamtökin spurninga vegna ársreikninga sem hann fékk að lokum frá landbúnaðaráðuneytinu eftir að hafa óskað eftir þeim frá Bændasamtökunum.

Þórólfur greinir frá því að Bændasamtökin hafi afskrifað tæplega milljarða króna skuld Hótel Sögu ehf. og Hótel Íslandi ehf. við samtökin

Þannig skrifar Þórólfur í Fréttablaðið í dag: „Árið 2006 virðist staða þessa áhætturekstrar hafa verið góð, en það ár hafnaði Búnaðarþing að selja hluta rekstrarins þó í boði væru 4,3 milljarðar króna. En skjótt skipast veður í lofti því sex árum síðar var eiginfé Hótels Sögu ehf. neikvætt um 2,5 milljarða króna skv. ársreikningi!"

Að auki færðu Bændasamtökin verðmæti hlutafjáreignar sinnar niður í núll, bæði í Hótel Sögu og Hótel Íslandi. Þórólfur spyr því hvernig það megi vera að rekstur hótelanna hafi versnað svo snögglega. Hann spyr einnig hvort taprekstur hótelanna sé sambærilegur við rekstur annarra hótela.

Þá spyr Þórólfur einnig hvort það sé eðlilegt að hagsmunasamtök eins og Bændasamtök Íslands, sem sýsla með almannafé fyrir ríkissjóð, standi í áhættusömum rekstri á borð við rekstur veitingahúsa og hótela.

„Ég held að einhverjir myndu furða sig á því ef félag prófessora færi að reka veitingastaði auk annarra starfa," segir Þórólfur.

Þórólfur gerir einnig athugasemdir við talsverðar vaxtatekjur af svokölluðu geymslufé.

„Hér vaknar sú spurning hvort þar sé um að ræða fé sem Bændasamtökin sýsla með í umboði ríkissjóðs. Geymslufé var um 160 milljónir króna um áramót 2007/8, um 350 milljónir króna áramótin 2008/9, 708 milljónir króna 2009/10 og 702 milljónir króna áramótin 2010/11. Aðeins er sýnd samtala vaxtatekna og vaxtagjalda, en líklegt er að brúttóvaxtatekjur aukist í takt við aukið geymslufé. Virðist því fara saman aukin fjárþörf Bændasamtakanna í tengslum við hallarekstur hótelrekstrarins og hækkanir upphæða á geymslufjárreikningi," skrifar Þórólfur í grein sinni sem má lesa í heild sinni hér fyrir neðan en í grein sinni spyr hann átján spurninga um rekstur hótelanna og fyrirkomulag geymslufés.